இந்த மொழிபெயர்ப்பின் மூலக் கட்டுரையை இங்கு காணலாம்.

ஈரானுக்கு எதிரான அமெரிக்க ஏகாதிபத்தியத்தின் போரை மிகப்பெரிய அளவில் விரிவாக்குவதற்காக, ட்ரம்ப் நிர்வாகம் தனது இராணுவப் படைகளை மத்திய கிழக்கு மற்றும் ஐரோப்பிய பகுதிகளில் குவித்து வருகிறது.

கடந்த புதனன்று வோல் ஸ்ட்ரீட் ஜேர்னல் பத்திரிகையில் வெளியான கட்டுரையின்படி, “விமானப் போக்குவரத்து கண்காணிப்புத் தரவுகள் மற்றும் அமெரிக்க அதிகாரிகளின் தகவல்களின்படி, கடந்த வாரத்தில் அமெரிக்கத் தளங்களிலிருந்து இந்தப் பகுதிகளுக்குச் சிறப்பு நடவடிக்கைப் படைகள் அனுப்பப்பட்டுள்ளன. மத்திய கிழக்கு முழுவதும் போர் விமானப் படைப்பிரிவுகள் நிலைநிறுத்தப்பட்டுள்ளன, மேலும் அமெரிக்கா மற்றும் பிரிட்டனில் உள்ள தளங்களில் இருக்கும் குண்டுவீச்சு விமானங்கள், நடவடிக்கைகளைத் தீவிரப்படுத்துவதற்காக உயர் எச்சரிக்கை நிலையில் வைக்கப்பட்டுள்ளன” என்று அதிகாரிகளில் ஒருவர் கூறினார்.

அக்கட்டுரையின் படி, ஜேர்மனியில் உள்ள லேண்ட்ஸ்டுல் பிராந்திய மருத்துவ மையத்திற்கு சமீபத்திய நாட்களில் 150-க்கும் மேற்பட்ட மருத்துவப் பணியாளர்கள் வந்துள்ளனர். இது வெளிநாடுகளில் உள்ள மிகப்பெரிய அமெரிக்க இராணுவ மருத்துவமனையாகும். மேலும், மத்திய கிழக்கில் காயமடைந்த துருப்புக்களுக்கான முதல் தங்குமிடமாகவும் இது விளங்குகிறது. ட்ரம்ப் நிர்வாகம் அமெரிக்க உயிரிழப்புகள் பெருமளவில் அதிகரிப்பதற்குத் தயாராகி வருகிறது என்பதன் தெளிவான அறிகுறியே இதுவாகும்.

பிரித்தானியாவில் நிறுத்தப்பட்டுள்ள B-1 ரக விமானங்கள் உட்பட நீண்டதூரக் குண்டுவீச்சு விமானங்கள் “பெரிய அளவிலான போர் நடவடிக்கைகளுக்குத்” தயாராகி வருவதாக வோல் ஸ்ட்ரீட் ஜேர்னல் குறிப்பிட்டுள்ளது. ஈரான் மீது மீண்டும் தொடங்கப்பட்ட குண்டுவீச்சின் முதல் தாக்குதல் பணியை ஒரு பி-1 விமானம் மேற்கொண்டதாக ஆக்சியோஸ் கடந்த வியாழக்கிழமை செய்தி வெளியிட்டது.

“நான் ஒரு பிரமாண்டமான தாக்குதலைப் பற்றி பரிசீலித்து வருகிறேன். அது, இதுவரை இல்லாத அளவுக்குப் பெரிய தாக்குதலாக இருக்கும்,” என்று அமெரிக்க ஜனாதிபதி டொனால்ட் ட்ரம்ப் ஆக்ஸியோஸிடம் தெரிவித்தார். “நான் ஒரு முடிவை எடுக்கும் நிலைக்கு நெருக்கமாக இருக்கிறேன். நாங்கள் அதற்காக முழுமையாகத் தயாராக உள்ளோம்” என்று அவர் கூறினார்.

ஈரானுக்கு எதிரான மோதலை விரிவுபடுத்துவது குறித்து ட்ரம்ப் பரிசீலித்துவரும் நிலையில், அவருக்கு “மேலும் வலிமையான இராணுவத் தேர்வுகளை” வழங்குவதே இந்தத் தாக்குதலின் நோக்கம் என்று வோல் ஸ்ட்ரீட் ஜேர்னல் எழுதியுள்ளது. பரிசீலிக்கப்பட்டு வரும் விருப்பத் தேர்வுகளில் ஒருவித தரைவழி ஆக்கிரமிப்பும் இடம்பெறும் என்று தெளிவாகச் சேர்க்கப்பட்டுள்ளது.

ஜூலை 15 அன்று, “அமெரிக்கப் படைகளைப் பயன்படுத்தி கார்க் தீவு மற்றும் ஹோர்முஸ் நீரிணைப் பகுதியிலுள்ள பிற பகுதிகளைக் கைப்பற்றுவது” குறித்து வெள்ளை மாளிகையின் அவசரகால ஆலோசனை அறையில் இடம்பெற்ற கூட்டத்தில் கலந்துரையாடப்பட்டதாக ஜேர்னல் மேலும் தெரிவித்தது. ஈரானின் பிக்காக்ஸ் மலையில் உள்ள அணுசக்தி நிலையங்கள் மற்றும் ஹோர்முஸ் நீரிணையில் உள்ள பிற தீவுகளைக் கைப்பற்றுவது உட்பட மேலும் பல சாத்தியமான இலக்குகளும் இந்தக் கலந்துரையாடலில் அடங்கியிருந்தது.

கடந்த ஆண்டு வரை உக்ரேனுக்கான ட்ரம்பின் தூதராகப் பணியாற்றிய ஓய்வுபெற்ற லெப்டினன்ட் ஜெனரல் கீத் கெலாக், “ஏதேனும் செய்ய வேண்டுமென்றால் உங்களுக்குத் தரைப்படை தேவைப்படும்” என்று பொக்ஸ் நியூஸ் தொலைக்காட்சியில் தரைவழிப் படையெடுப்புக்கு அழைப்பு விடுத்தார்:

ஹோர்முஸ் நீரிணையை பலவந்தமாக மீண்டும் திறப்பதற்கான அமெரிக்காவின் முயற்சி ஒரு மிகப்பெரிய சவாலான பணியாக இருக்கும். ஈரானின் ட்ரோன்கள் மற்றும் ஏவுகணைகளை ஏவும் திறனைக் குறைப்பதற்கு, அமெரிக்கா ஒரு இரவுக்கு 150 முதல் 200 தாக்குதல்கள் வரை பல வாரங்களுக்கு நடத்த வேண்டியிருக்கும் என்று ஓய்வுபெற்ற அமெரிக்க கடற்படை ரியர் அட்மிரல் மார்க் மாண்ட்கோமரி வியாழக்கிழமை வெளியான பைனான்ஷியல் டைம்ஸ் கட்டுரை ஒன்றில் தெரிவித்துள்ளார். மேலும், “அனைவரையும் அச்சுறுத்தி பின்வாங்கச் செய்ய ஈரான் ஒரே ஒரு எண்ணெய் கப்பலைத் தாக்கினால் போதுமானது” என்று ஒரு கடல்சார் ஆலோசகர் கூறியதையும் பினான்சியல் டைம்ஸ் மேற்கோளிட்டுள்ளது.

ட்ரம்ப் மீண்டும் இனப்படுகொலை வன்முறை தொடர்பான தனது அச்சுறுத்தல்களுக்குத் திரும்புகிறார். புதன்கிழமை, அவர் ட்ரூத் சமூக வலைத் தளத்தில், ஹோர்முஸ் நீரிணையில் கப்பல்கள் மீது ஈரான் நடத்தும் எந்தவொரு தாக்குதலுக்கும், “தலைநகர் தெஹ்ரானுக்கு அருகிலோ அல்லது அதற்குள்ளோ அமைந்துள்ள பாலம் அல்லது மின் உற்பத்தி நிலையம் ஒன்று” அழிக்கப்படுவதன் மூலம் பதிலடி கொடுக்கப்படும் என்று பதிவிட்டார். இது, “பொதுமக்களின் சொத்துக்கள் தாக்குதலுக்கோ அல்லது பழிவாங்கும் நடவடிக்கைகளுக்கோ இலக்காகக்கூடாது” என்று கூறும் ஜெனீவா உடன்படிக்கைகளின் கீழ், போர்க் குற்றங்களைச் செய்வதற்கான நோக்கத்தின் பகிரங்க அறிவிப்பாகும்.

கடந்த வியாழக்கிழமையன்று, அமெரிக்க வெளியுறவு அமைச்சர் மார்கோ ரூபியோ, ஈரானின் எந்தவொரு எதிர்ப்பிற்கும் விகிதாசாரமற்ற முறையில் பழிவாங்கும் கொள்கையை அறிவித்தார்: “ஒரு கண்ணுக்கு பதிலாக ஒரு தலை”. இவ்வாறு நிர்ணயிக்கப்பட்ட விகிதத்தில் பழிவாங்குவது ஹிட்லருடைய சர்வாதிகாரத்தின் மோசமான நடைமுறைகளில் ஒன்றாகும்.

இப்போது ஐந்தாவது மாதத்தை எட்டியுள்ள இந்தப் போரின் தீவிரமான சூழலால், ட்ரம்ப் நிர்வாகம் மேலும் மேலும் மோதலை தீவிரப்படுத்தும் நிலைக்குத் தள்ளப்பட்டுள்ளது. ஈரானிய அரசாங்கத்தைக் கவிழ்ப்பது மற்றும் உலகின் பெரும்பகுதி எண்ணெய் மற்றும் இயற்கை எரிவாயு கடந்து செல்லும் ஹோர்முஸ் நீரிணையைத் தன் கட்டுப்பாட்டில் கொண்டுவருவது உள்ளிட்ட, தான் அறிவித்த எந்தவொரு நோக்கத்தையும் அமெரிக்க ஏகாதிபத்தியத்தால் அடைய முடியவில்லை.

ட்ரம்ப் நிர்வாகத்தின் ஒவ்வொரு தோல்வியும், இன்னும் பெரிய மற்றும் ஆபத்தான மோதல் தீவிரப்பாட்டிற்கே வழிவகுத்துள்ளது. கடந்த ஜனவரி மாதம், ஈரானிய அரசாங்கம் கவிழ்ந்துவிடும் என்ற நம்பிக்கையில், அந்நாட்டிற்குள் நடந்த போராட்டங்களை ஊக்கப்படுத்தவும் அவற்றுக்கு ஆயுதம் வழங்கவும் ட்ரம்ப் நிர்வாகம் முயன்றது. அந்த நடவடிக்கை தோல்வியடைந்ததைத் தொடர்ந்து, பிப்ரவரி 28 அன்று ஈரானின் தலைவர்களைக் கொல்வதன் மூலம் ஆட்சி மாற்றத்தைக் கொண்டுவர ட்ரம்ப் முயன்றார். இந்தப் படுகொலைகளாலும் ஈரானிய மக்களின் எதிர்ப்பை முறியடிக்க முடியாமல் போகவே, நிர்வாகம் பல மாதங்களாகத் தொடரும் குண்டுவீச்சுத் தாக்குதலுக்கு மாறியது. இதில் 3,600க்கும் மேற்பட்டோர் கொல்லப்பட்டனர். தற்போது அதன்மீது பொருளாதார முற்றுகையும் தொடர்கிறது.

தற்போது, ​​அமெரிக்க ஏகாதிபத்தியத்தின் கௌரவத்தைக் காப்பாற்றுவதற்கான ஒரே வழியாக, ஒரு பிரம்மாண்டமான மற்றும் விரக்தியடைந்த அளவிலான மோதல் தீவிரப்பாடே ஒரே வழி என ட்ரம்ப் நிர்வாகம் கருதுகிறது. மார்ச் 1965 இல், ஜோன்சன் நிர்வாகம் வியட்நாமில் போரைத் தீவிரப்படுத்த ஆயத்தமானபோது, பென்டகன் ஆவணங்களில் பின்னர் வெளியிடப்பட்ட ஒரு குறிப்பில், உதவி பாதுகாப்புச் செயலாளர் ஜோன் மெக்நாட்டன், அமெரிக்க நோக்கத்தில் 70 சதவீதம் “ஒரு அவமானகரமான அமெரிக்கத் தோல்வியைத் (ஒரு உத்தரவாதமளிப்பவர் என்ற நமது நற்பெயருக்கு ஏற்படும் களங்கத்தை) தவிர்ப்பதே” என்று எழுதியிருந்தார். அதே மாதத்தில், முதல் 3,500 கடற்படையினர்கள் டா நாங்கில் (Da Nang) தரையிறங்கினர். 1968 இன் இறுதியில், 5,36,000 அமெரிக்கப் படைகள் வியட்நாமில் இருந்தன.

இன்னும் அதிக ஆபத்தான சூழல்களுக்கு மத்தியில், ஈரானுக்கு எதிரான போரிலும் இதே போன்றதொரு தீவிரமான நிலைப்பாடே காணப்படுகிறது. கிட்டத்தட்ட ஐந்து மாத இழப்புகளுக்குப் பிறகு பின்வாங்குவது, உலக அரங்கில் குறிப்பாக அதன் போட்டியாளரான சீனாவின் பார்வையில் அமெரிக்க ஏகாதிபத்தியத்தின் உலகளாவிய நிலையைச் சிதைத்துவிடும் என்றும், அமெரிக்க மேலாதிக்கத்திற்கு அது பேரழிவை ஏற்படுத்தும் அடியாக இருக்கும் என்றும் வாஷிங்டன் கணக்கிடுகிறது.

பிரமாண்டமான கடன் சுமையால் தள்ளாடும் அமெரிக்க ஏகாதிபத்தியம், உலக நிதி அமைப்பில் டாலரின் மேலாதிக்கத்தில் ஏற்படும் ஆழமான நெருக்கடியையும் எதிர்கொள்கிறது. பொதுமக்கள் வசம் உள்ள கூட்டாட்சி அரசின் கடன் அளவு நாட்டின் மொத்த உள்நாட்டு உற்பத்தியில் (GDP) 100 சதவீதத்தைக் கடந்துவிட்டது, உலகளாவிய கையிருப்புச் சொத்துகளில் டாலரின் பங்கு கடந்த மூன்று தசாப்தங்களிலேயே மிகக் குறைந்த அளவை எட்டியுள்ளது. மேலும், ஜூன் மாத இறுதியில் வெளியிடப்பட்ட மத்திய வங்கிகள் குறித்த ஆய்வொன்றில், வரவிருக்கும் பத்தாண்டுகளில் தங்களது டாலர் கையிருப்பை அதிகரிப்பதை விடக் குறைப்பதற்கே அதிக எண்ணிக்கையிலான வங்கிகள் திட்டமிட்டுள்ளன என்பது முதன்முறையாகக் கண்டறியப்பட்டுள்ளது.

இந்தப் போருக்கு முழு அரசியல் ஸ்தாபனத்தின் ஆதரவும் உள்ளது. கடந்த புதன்கிழமையன்று, பிரதிநிதிகள் சபை 1.15 டிரில்லியன் டாலர்கள் இராணுவ அங்கீகார மசோதாவை 216-212 என்ற வாக்குகள் கணக்கில் நிறைவேற்றியது; ஆறு ஜனநாயகக் கட்சியினரே இந்த வெற்றிக்குத் தேவையான பெரும்பான்மையை வழங்கினர். மசோதா நிறைவேறுவதற்குப் போதுமான வாக்குகளை ஜனநாயகக் கட்சியினர் உறுதி செய்த பிறகு, எஞ்சியவர்கள் மசோதாவிற்கு எதிராக வாக்களிக்க அனுமதிக்கப்பட்டனர். கடந்த ஜனவரி மாதத்தில், 149 பிரதிநிதிகள் சபை ஜனநாயகக் கட்சியினர் 839 பில்லியன் டாலர்கள் இராணுவ நிதி ஒதுக்கீட்டு மசோதாவிற்கு ஒப்புதல் அளித்தனர். இந்த நிதியே ஐந்து வாரங்களுக்குப் பிறகு ஈரான் மீது நடத்தப்பட்ட தாக்குதலுக்குப் பயன்படுத்தப்பட்டது.

ஜனநாயகக் கட்சியினரின் விமர்சனங்கள் அனைத்தும் ட்ரம்பினால் போரில் வெற்றியைப் பெற முடியாமல் போனதை சுற்றியே அமைந்துள்ளன. மிச்சிகனைச் சேர்ந்த ஜனநாயகக் கட்சி செனட்டர் கேரி பீட்டர்ஸ் செவ்வாய்க்கிழமை நடைபெற்ற செனட் விசாரணையில் இதை மிகவும் வெளிப்படையாகக் கூறினார். பீட்டர்ஸ், பாதுகாப்பு அமைச்சர் பீட் ஹெக்சேத்தை ஒரு “தோல்வியாளர்” என்று அழைத்ததோடு, “உங்களிடம் எந்தவொரு மூலோபாயமும் இல்லை. இந்தப் போரில் உண்மையில் வெற்றி பெற உங்களிடம் நீண்டகாலத் திட்டமும் இல்லை. போரில் வெற்றி பெறுங்கள்!” என்று கூறினார்.

ஈரானுக்கு எதிரான போரை நடத்தும் முறை, ரஷ்யாவுடனான போரின் மீது அமெரிக்கா செலுத்த வேண்டிய கவனத்தைக் குலைத்துவிட்டதாகக் கருதும் ஆளும் வர்க்கத்தின் சில பிரிவுகளுக்காகவும் ஜனநாயகக் கட்சியினர் பேசுகின்றனர். ஏனெனில், அவர்களின் பார்வையில் ரஷ்யாவுடனான போரே உலகளாவிய அமெரிக்கப் போரின் மிக முக்கியமான களமாகும்.

புகோள அரசியல் மூலோபாயம் தொடர்பான மோதல்களுக்கு அப்பால், கீழிருந்து எழும் மக்கள் எதிர்ப்பு உருவாவதைத் தடுப்பதே ஜனநாயகக் கட்சியின் முக்கிய கவலையாக உள்ளது. போர் தொடங்கியதில் இருந்தே அதை எதிர்த்து வரும் அமெரிக்க மக்களுக்கு, எந்தவொரு அரசியல் அமைப்பில் இருந்தும், இதுபற்றி எந்த விளக்கமோ எச்சரிக்கையோ இன்றி இந்தப் போர் தீவிரப்படுத்தப்பட்டு வருகிறது. போர் பெருமளவில் தீவிரப்படுத்தப்படுவதற்கான ஆயத்தங்கள் குறித்து ஆளும் வர்க்கத்தின் எந்தப் பிரிவினரும் மக்களுக்குத் இதுபற்றி தெரிவிக்கவில்லை.

தற்போது நடைபெற்று வரும் போரின் தீவிரவாக்கமானது, ஈரானிய மக்கள், அந்த பிராந்தியம் மற்றும் முழு உலகத்திற்கும் பேரழிவு தரும் விளைவுகளை ஏற்படுத்தும். ஏகாதிபத்தியம் அதன் பரப்பளவில் தொடர்ந்து விரிவடைந்து வரும் ஒரு உலகளாவிய போரின் தொடக்கக் கட்டத்தில் உள்ளது. ஒவ்வொரு புதிய கட்டத்திலும், அணு ஆயுதப் போருக்கான ஆபத்து அதிகரித்து வருகிறது.

இந்தப் போர் தொழிலாள வர்க்கத்தின் சமூக நிலையின் மீது ஒரு மாபெரும் தாக்குதலுக்கான கட்டமைப்பை உருவாக்கியுள்ளது. முன்னெப்போதும் இல்லாத அளவில், போருக்கான செலவினங்களுக்கு மற்ற அனைத்தும் அடிபணியச் செய்யப்படவுள்ளன. சமூகப் பாதுகாப்பு, மருத்துவ பாதுகாப்பு, மருத்துவ உதவி போன்ற காப்பீட்டுத் திட்டங்கள் ஆகியவற்றின் மீது தாக்குதல் நடத்துவதற்கான தன்னலக்குழுவின் நோக்கத்தை ட்ரம்ப் வெளிப்படுத்தியுள்ளார். பட்ஜெட் மற்றும் கொள்கை முன்னுரிமைகளுக்கான மையம் அளிக்கும் தகவலின்படி, ஏற்கனவே 15 இலட்சம் குழந்தைகளுக்கான உணவு உதவி நிறுத்தப்பட்டுள்ளது.

மீண்டும் தொடங்கப்பட்டுள்ள குண்டுவீச்சுக்கள், அமெரிக்கக் குடும்பங்களில் பேரழிவை ஏற்படுத்தும் தாக்கத்தை ஏற்படுத்தி வருகிறது. ஒரு மாதத்திற்கு முன்பு 3.14 டாலராக இருந்த ஒரு கேலன் பெட்ரோலின் விலை, இந்த வாரம் 4 டாலரைக் கடந்துள்ளது. மேலும், இந்தப் போரினால் சராசரி குடும்பத்திற்கு எரிசக்திச் செலவுகள் சுமார் 450 டாலர் வரை அதிகரித்துள்ளதாக CNBC மதிப்பிட்டுள்ளது — இது ட்ரம்ப் வாக்குறுதியளித்த வரித் தள்ளுபடியை விடக் கூடுதலாகும். கடந்த மூன்று ஆண்டுகளில் முதன்முறையாக, பணவீக்கம் தொழிலாளர்களின் அனைத்து ஊதிய உயர்வுகளையும் அழித்து வருகிறது.

இந்தப் போர் அமெரிக்காவிலும் உலகம் முழுவதிலும் வர்க்கப் போராட்டத்தின் வளர்ச்சியைத் தவிர்க்க முடியாமல் தூண்டி வருகிறது. ஏற்கனவே, 2026-ஆம் ஆண்டின் முதல் பாதியிலேயே, இந்தப் போராட்டம் வெடிப்பார்ந்த முறையில் வெளிப்படத் தொடங்கிவிட்டது. ஏகாதிபத்தியப் போருக்கு எதிரான போராட்டமானது, சோசலிசத் வேலைத்திட்டத்துடன் ஆயுதபாணியாகிய சர்வதேசத் தொழிலாள வர்க்கத்தை அடிப்படையாகக் கொண்டதாக அமைய வேண்டும்.